ZSP Shillong Branch Silver Jubilee 2008

ZSP Shillong Branch 26th Freshers' Social Meet 2009

LETTER TO ZYF, Shillong

Ka lawm iit-tah te aw,

Kumtawn a siemmaw tang ding a I om lai ua eite hing iit a a tapa tangkhat neisun hing pie PASIAN, mawnei ei ding a ahinna hingpie JESU CHRIST, leh eite hing hamuantu HAGAU SIANGTHOU min in ka hing nousiet hi!

Zou Youth Fellowship August 23 chieng a bawlkia ding chi thu ka zah in ka kipah seng seng a, tuaziehin tami lai tungtawn in kang kipahpi na leh hanthawnna thu tamlou ka hing gen nuam hi. I mi nam leh hattuam sung a buai veng vung lai a khanglai lungsim siangthou I om nalai uh pen Pasian kipahna ahi. Noute zieh in I bieh uh Pasian ka pahtawi hi. Lamkaite apan nautaangte zousie Pasian in sil lienpi bawl zou ding in hing gualzawl ta hen.

Hunsawtpi apan mun tampi te ah I mi nam sung pen pawlpi zieh in kikhenna leh kidaidanna uong mama nanleh tuni’n khangtha te’n I hinkhuo uh Jesu Christ khantanhoi toh kituah a zang a, lungsim siangthou leh iit-na toh vai I hawm uh ka gelchieng ka nuam seng hi. Mangpa’n noute tungtawn in thupi na tang hen!! ZYF te’n “Unity in Christ” chi thupi zang a fellowship na nei uh pen Pasian lungdamna ahi chi manghil sih un. Tuaziehin tami fellowship khu eima nopsah nang mai hilou in Pasian pahtawina leh Pasian lungdeilam ahi zing nang in hanchiem zing un.

Christ in khentuam aneilou bang in noute zong Jesu Christ ah khat leh khat ki iit-tuo zing un. Aw khanglai, Mangpa’n nang leh kei hing tulmaw hi. Tuni’n nang leh kei ahing han a, a cross puo a damsung a ama nuazui ding in hing han hi. I mi nam te’n Pasian ma I bel tin ten lou uleh I khangtou nang lampi dang omlou hi. Tuaziehin, ZYF member zousie te aw Pasian mama pibawl vai in, ama ah ki bul phu det kia va ui. Jesu Christ ah pawlpi zieh in kidaidanna a omsih a, ama a ginna neizousie khat ahi. Tuaziehin eite zousie zong pawl tuam tuam ah omnanlei Christ ah khat, HATTUAM mi ihi chiet uhi.

I mi nam sung khangtha te’n vai I hawm ua, Christ a lungsim ki pumkhat a I om ding hun uh ka ngaituo chieng in ka ngahla seng hi. I mi nam sung ah mipil leh misiem noute’n khentuam neilou a vai na hawm uh pen hing tawpsan sih un. Silhoi bawl chimtah sih poulei ahuntah chieng in aga I aat na ding uhi.


Pasian a ding a lungsim siang kuo ka khanglaipite aw, Mangpa’n sil lienpi bawlsem ding in nabawn un hing gualzawl hen.
Mangpa’n a hattuam leh I mi nam a ding in nang leh kei hing tulmaw hi.

Christ a noute hing iit,

Lalpi Zou
West Virginia, USA
Email: lalpi_zou@yahoo.in

ZOHEISA

ZOHEISAVoice of Zou Students’ Association, Shillong Branch
Motto: For God and the Community
Vol. I Issue No.1 July 2009

Editorial …
Diamdiam in Lungkhat Kuo Vai

Unau Simtu deitahte, I Zoheisa dawkan tung pan itna chibai kang bawl hi.

Ipi leh ipute in “ Kamsung ah lei leh ha zong kikpet thei” na chi uh hiven, mihing hina zieh in bawlkhiel hun leh kisiet kibal hun zong om kha ding hi. I kisietpi leh iki haupi zing khu koima dang hilou in iki naipi leh kizopna hoi I neipite ana hi khinkhian hi. Kizopna I neipi loute toh iki suol in iki hauthei sih uhi. I kisietpite khu I ompi gige leh I kung a omte ahi. Kihau kichi khu thupatna( beginning) a hi a, kilemna khu thuzawna (conclusion) ahi. Ganhing te khu a kimu pat un a kihau ua, hinanleh a kisuol seeng zoulou chieng un, sawtpi ang opkhawmtah chieng un ki-it ua, ganhing dangte toh a kisuol chieng un kipanpi tuozel uhi. Mihingte pen iki mupat chieng un, ki-it dandan in acting I bawl ua, sawt I om khawm chieng un iki hau ua, thuzawna khu kisuolna toh I zou uhi. Eimite bulpatna kihau, kiseel kikhen leh a dangdangte siem napi thuzawna kilemna khu I bawlsiem sih uhi. Mi khat in I tung a sil a bawlkhiel leh “ Ka shi chieng in zong Manghil sih vang” chiin iki hanchiem ua, lungkim loudan I siem mama uhi. Hoina pen tomkhat sung dainapi sawt dailou a, damsung gentahlou, kalkhat sung vel chauh I daisah uhi. Thusie I gen ut zaza in thuhoi I sanggamte kung a geen hilei, I gamsung ah itna chi pou ngeingei ding hi. Bible in”Leitung ah silthah bangma a umsih, a omsa a om kia zel ahi” chiin Ecclesiastes sungah ana geen hi. Kisiet kibal chite khu eima pat hilou in a omsa bawlkia ihibou ua, tuazieh in hun paisa sutsut a hinkhuo zanglou in itna toh I sanggamte tung ah nasep a lungkhat kuo diing poimaw hi. Lungkhat I puoh uleh, tahsa a omkhawm lungsim kibanglou te sang in iki pumkhat zaw diing uhi.

ZSP THUSIM:ZSP/SB 2009 LAMKAITE
President :Tv.S.Thangboi Zou
V/President : Nh.Haunieng
Gen. Secretary :Tv.JamesThangboi
Jt.Secretary :Tv.Siampu Manlun
Fin.–cum-Treasurer : Nh.Zolinda
Co-Ordinator : Pa Daiminthang

DEPARTMENTAL SECRETARIES
Social, Art & Culture : Nh.Zokim &
Jenny Thangneivah
Education : Tv.Thangmuanlal
Music :Tv.Goukhanpau &
Tv.Kamlalmuon
Games & Sports : Tv.Paulianmang & Tv.Mangsienhau
Moral & Rel. :Tv.James Haupu
Statistics : Tv.Dongminlian
Information & Publicity : Tv.Tongsuanlian, Tv.Lianzamang, Tv.Lunhaulian & Tv.T.Benjamin
Volunteers:
Pa Lucas, Pa Gingin & Pa Hausuanlam

ADVISORY BOARD
Social Art & Culture :Pa Dominic
Games & Sports :Pa Khupminthang
Moral & Religion : Upa Haulam
Education : Nu Sonchin

THEISAHNA LEH NGETNA THUSUO
Koizong October 4, 2008 Silver Jubilee I zatlai ua, ngainatah a chiel a na um Special Invitees te khu Memento leh Souvenir khat chiet ang ki-present a, tuami khu ngap dandan a ZSP/SB kithuopi diing a ikiphut uh penailoute’n August 2009 masang ngei a peding in iki ngen uhi.
Tualeh, Silver Jubliee vai a Sponsor a sum penailou khat leh ni in zong hing ngai poimaw a, a kintheilam a hing peta diing in Finance Secreary Nh.Zolinda in ZSP thataang in ngetna leh theisahna bawl hi.

AWARD PIEH DIING CHIEM UH
United States a um Tv. Thangzabawi in a paneu Upa (L) Nengzagin theizingna ding in MBOSE leh NEHU nuoi a top 10 tan tung zou a um leh Rs.5000 pieh chiem hi.
Tuabanah, Pu Khupminthang in zong ZSP Member te lah a percentage sang penpen te 2007 Freshers Meet Chief Guest a panlai in Award pieh ana chiem khinta hi.
Koizong tam Award mu ding a umte in Edn. Secy. Tv.Thangmuonlal kung ah a kinthei lam a kitheisah ngai diing hi.

ZYF KIKHOPNA ZWS AH OM
Zou Youth Fellowship Shillong chi a ki min vaw pawlpi tuomtuom apat Khangnou kipawlkhawmte’n June 14,2009 ni in Zou Worship Service ( ZWS ) kikhopna, DBYC ah Fellowship masapen a nei ua, nuomtah leh hengla tah in zou uhi. Tuanah, S.Thangboi, Convenor in ZYF khu motto “Unity in Christ” ahibang a, Khanglaite kipawlkhawmna diing, pawlpi a ki deidanna subei diing, tahsa hagau a unau ihina suhat ding chi leh ZYF in Pawlpi guptuom paituom neilou ahidan leh tup leh ngimte gen a, Tv.Gominlun, Secretary PYF, Tv.Ginthang, Chairman LYF, Tv.Khupmuonlian, Chairman ZWS (Youth) leh Tv.Edmund K.Munluo, Catholic (Youth) te’n ZYF hoisa uh ahidan leh gin-om tah a pang zing ding uh ahidan genna nei uhi. Lapuite in la noptah ah a pui banah uah, lapawl siemtah a kisa ngaina zong om hi.
Tualeh, Tv.Khamlianlal in Pasian thu siengthou genna nei hi. Programme teng zou in khotuol ZWS te’n ana sai uh Niengtui leh nehthei limtah ne in mipite tahsa hagau ah tai mama uhi. Lamkaite apat thu kizadan in, August chieng in Lutheran Church leh October chieng in Presbyterian Church ah om kia diing hi’n gen uhi.

SLC IN J.K.HAU UPA IN TEEL
Shillong Lutheran Church (SLC) in June 21 ni in Hattuom enkoltu diing in Upa khat teel ua, tuanah SLC Chairman Retd.Hony Capt Pu Jangkhohau, kituohtah in teelching ta uhi.

GOSPEL OLYMPIC NEIDIING
ZPC Shillong in naupangte vacation hun ahiziehin naupangte adiing in Gospel Olympic noptahmai July 18 chieng in neisawm ua, tahsa hagau ah kisuhhal na leh ki-apmaina chi tuomtuom ah kidem ding uh hi’n thu kiza hi.

KEYBOARD THAH LEITA UH
Zou worship Service (ZWS) in Music Instrument, Keyboard/piano hoitah sum tampi seeng in leikheta uh hi’n thu kiza hi.
Tuabanah, LYF in zong tukum sung ngei in Nu Manpi te innkuon huuna toh keyboard hoitah neita diing uh hi.

EIMI NEWS TAMPI OMTA
Shillong eimite News lam ah masawn mama a, nidang lai in ZSP News ZOHEISA chauh imu lai in, tuni chieng in pawlpi chin in amauh kithuzahna ding News kinei chiet ta uhi. ZPC in kalteng in KHANGLAI AW chi suo ua, SLC in TONGSAAN leh ZWS in ZWS LINK chi khakhat in khatvei suo khe zel uhi.

SISAN PIEH NGAI DIING
Upa Khamhang a tanu Nu Chinneu Dima te beel in NEIGHRIHMS ah damlou in om a, 13/07/09 (Monday) chieng in ki-at (Operation) kibawl ding ahizieh in sisan unit ni veel poimaw diing a, tuanah, a innsung mite beidong in ZSP te kung ah ngetna hin nei uh ahizieh in, koizong pasalpha/nusalpha sisan pe ding a ki pekhie I om leh President Tv.S.Thangboi theisah ding in iki ngen uhi. ZSP in Good Samaritan Award hing pe ding hi.

Cl-X & XII Results
Tutung ZSP member cl-X, XII leh Degree Result theipha tasunte;
Class - X
1.Nikita
d/o Sanjiv - 1st Div.
2.Nelngaikim
d/oThangzakhup–1st Div
3.Lhaineihoi
d/o Jangkhohau - 1st Div
4.Ngaineihoi
d/o Mandeiching -1st Div
5.Niangdeiching
d/o M.K.Mung - 2nd Div
Class - XII
1.Hahau s/o Thangzakhup
-1st Div
2.Solomon s/o Peter P.C.Khup
-2nd(Arts)
3.Doukhuollian s/o M.K.Mung
- 2nd (Arts)
4.Khaikholians/o Kaisuanhang
-2nd(Arts)
Lawchinna ngateng tung ah Edn.Secy. in ZSP/SB min in kipahpina thu gen a, lawsam te zong puohnat pi thu gen in lungkelou a maban a panla tou diing in hanthotna thu hing thee hi.


USA AH ZCC KIPHUT DIING
August 2, 2009 chieng in eimi United States of America (USA) a om pawl in Methodist Church, Fort Wayne, Indiana ah eima ham in Pasian biehna panta diing uhi. Tam kipawlkhawmna khu Zo Christian Church (ZCC) chin ki minvaw diing uh hi.

ZSP GHQ 2009-12 VAIPOTE
President :Pu Nengchinlam
Vice President : Pu Chinkhenpau
Gen.Secretary : Pu Khaiminlian
Jt.Secretary : Pu Lalkhawm
Fin. Cum– Treasurer : Pi Niangbawi

ZSP DELHI FRESHERS MEET
September 21 chiengin Zou Sangnaupang Pawlpi, Delhi Branch in Freshers Meet thupitah in nei diing ua, October 6 chieng in Annual Sports Meet nei ding uhi. Ei Shillong Frehsers Meet zong a gimsii lang panpan ta ei...

Thu Lam leeng…
ZYO GHQ IN HILCHETNA BAWL
ZYO GHQ in thusuo a bawlna uah, Delhi ZYO kiphu tungtaang a sil umdan leh maban Zou ta kichi taphot in ZYO pen i nampi khutzah leh nopni dahni a amin lou a iki puihuoina uh ahiman in zop chiet ding leh soisel nawnlou ding in ngetna bawl uhi. Tuaban ah ZYO min sesahthei ding leh a hilou banga, thu gen-leh-sah a um nawnlouna dingin koipou in panla chiet ding in ngetna leh theisahna bawl ua. ZYO nielkal leh pomnuomlou a um a ahileh shini, manni, nopni leh dahni a zong ki ngaisah lou ding ahidan chiengtah in talang uhi.
Heisung mun ah umnanlei shini/manni nikhuo a iki “Khaikhawmna” ding un lamkai masaten ZYO na phut uhi. Tunitan in kum 25 bang nasem ta a, i pawlpi dangte ZSP leh ZLS bang in UZO ah dinmun kiptah nei hi. ZYO GHQ in ZSP, UZO leh ZLS chilou nampi sung ah Civil organization dang theipilou leh pom hilou chiin thusuoh in geen hi.

ZSP GHQ IN BLOCK LEH BRANCH TE VEENA NEI
ZSP GHQ panlah tahtah sawm in block, branch leh Unit khenkhat veena nei in panlah diingdan genkhawm ua, June 30 in Behiang Block honkhietna nei ua, Singngat leh Haupi Block zong tuani mama in veesuoh ngal uhi. July 2 in Kailamnuoi, July 4 in Sachih Tampak ah Kana Block vehna, July 10 in Imphal Block leh July 11 chieng in Moreh Branch vehna nei uhi. Tualeh, July 18 chieng in Lamka Block te toh “ Competitive mind in Competitive World” chi thupi zang in houlim khawm ding ua, August 8 chieng in Council nei ding uhi.

ZSP GQ IN AWARD TUOMTUOM HAWM
ZSP GHQ in Cl-X & XII lawchinna kipahpi kikhopna leh Award chi tuomtuom hawmna June 13 ni in nei ua, Career Seminar leh Career Hand Book honkhietna zong nei uhi. Award a hawmte uleh a latute;
1.(L) Rev.Doupu Award (Zou MIL in cl-X) :
Ms.Sylvia L.N.Mawi d/o Michael Ginzasuan
2.(L) Thangkhanlal Award (ZSP Topper in Cl-X) :
Ms.Sylvia L.N.Mawi d/o Michael Ginzasuan
3.(L)Vungkhoching Award:
4.Kapu Saipu Award( Zou MIL in Cl– XII) :
Ms.Ruthy d/o Chinkhanthang
5.Pu Suohzahau Award(ZSP Topper in Cl-XII) :
Ms.T.Ngaideiching d/o Chinsuanthang &
Mr.T.Bosco Munluo s/o Dominic K.Munluo

USA AH UZO KHAWMPI NEI UH
Eimi United States a omte in a ngaveina United
Zo Organisation (UZO) Khawmpi Fort Wayne, Indiana mun ah June23-34 sung nei ua, Miss UZO teelna leh Sports chi tuomtuom bawl in kisuhhalna programme bawl uhi. Constitution and By-Law zong pomkipna a nei ban uah 2009-12 laamkai diing teelna zong nei uhi. President diing in Pa Khamgopau leh Secretary diing in Pa Khamthawngthang te teelching uhi. Amauh’n Malaysia a eimi galtai genthei hamsa thuohte ding in sumzong thawkhie uhi. Khawmpi sung in khotuolte leh naupangte sim in mi 400 vel kisutuo thei uh hi’n kigen hi.

ZO SUANTE INTERNET AH KHANGTOU MAMA
Kovel a khantou dungzui in Zo suante zong Internet lam ah khangtou mama a, mimal leh pawlpi tamtah in eima mimal laigel leh article te khawl khawmna diing in blog site tampi bawl in omta a, tuabanah, India a Zo suante in thu kikup khawmna ding in Zou Workshop leh News leh sil chi tampi etna ding in zolengthe.net zang ua, Myanmar lam deute in thu kikupna ding in PUZONET leh News leh adangdang etna diing in PU-ZO.com zang uhi.

ZH INNDONGTA:
Editor : Tv. S. Joel Lianmang
Jt.Editor :Tv. Khupmuonlian
Circular Manager : Tv.Paulianmang
Business Managers : Nh. Zolinda & Nh. Lunnu Tungdim (ARC)

ZOU SANGNAUPANG PAWLPI, SHILLONG BRANCH KHANGTHU

ZOU SANGNAUPANG PAWLPI, SHILLONG BRANCH KHANGTHU

Kum 1970 masang lai pan in eimi sangnaupangte lekhasim in Shillong khopi ah na ki omta a, hinanleh, mi duthusam bang a tamlou ahizieh in, Pu Nehkhojang lamkaina nuoia na kiphut Eimi Students’ Union ah na ki om hi. Nam tuomtuom; Kuki, Paite, Zou, Vaiphei, Simte leh adangdang ham kitheituo teng tammi ah na ki om khawmchiet hi. Ei(Zou) te zong panmun poimaw tahtah na kitu hi.Pu Gengoukhup Mate(1975-76) leh Pu Michael Ginzasuan(1976- 78) te’n ESU ah President hina na tu khatuoh uhi.

Kumchin a mi pung semsem ahina ah Zou te zong hun khop ki-omta ahiziehin, nopni-dani chieng ki uoppi tuo ding mi ki-omta chi’n Pu Kapkhanthang @Kapmeng, Manager, Bank of India lamkaina toh Pu Kapmeng Inn, Laitumkhah ah February 14, 1983 ni in Shillong Zomi Sangnaupang Pawlpi phukhiet in om hi.President ding in Pu Thangngaimang, Secretary ding in Pu Tuolminthang leh Treasurer ding in Pi Ngaikhanching te guot uhi. Lamkai poimaw ZSP Shillong phukhiet a tel khenkhat ahileh; Pu Gouchinlian, Pi Hahat, Pu (L)Thangzangam, Pu (L)Letkhankap, Pu Tuolzamang, Nurse zilte leh Sangnaupang khenkhat ahi.Tami kum ma in Annual Meet zong na nei ua, Chief Guest in Mrs.C. Doungel pang hi.Tami ZSP Shillong ana phuna ziehuh tangpite ; 1.Nopni-dani a ki-uoptuo ding 2.Zouham leh Zou Ngainate kepbit ding 3.Unau khat kitheituo loute kithei tuona ding 4.Siemzilna suhhat semsem ding leh adang tampite ahi. Bank of India ah Bank Account khat Shillong ZSP min in na hong ua, tuakhu, Shillong ZSP van(property) nei masahpen leh khangthu suutna omtheisun ahita hi.

JOINT FELLOWSHIP

Zou khangnoute'n pawlpi/hattuom tuomtuom ah um kipona a, pawlpi khat ah umthei sih nanlei khangnoute kaal ah kideidanna/kimusawi na beitheileh chi ngaisutna leh Krist a pumkhat leh tahsa a unau ihina sulatna ding in, Dt.19/04/09 Sunday 2:00pm in Tv.Joel leh Tv.Ginthang te panlahna toh Shillong Lutheran Church ah Zou Presbyterian Church, Shillong Luteran, Zou Worship Service, Catholic leh adg. apat khanglai palai mi 28 paikhawmten, "Chibah nempi tahsa pumkhat ahi" chi pansan in kihoulimna leh ki kawmtuo diing dan ngaituo ahi.Tv.S.Thangboi in Meeting Chair hina la in,Rev.Kamminthang in thumna anei zou in kikupkhawmna pat ahi.Thu kupkhawm leh phasah khenkhat a nuoia bang ahi.

1.JOINT FELLOWSHIP chia kipawlkhawmna kumkhat ah thumvei nei ding leh pawlpi chin in khatvei chiat innteehna(host) hina a lah ding ua lemsah leh nget ahi.

2.Tam Joint Fellowship lamkaiding leh programme bawlding in ZPC,SLC,ZWS leh Catholic khanglai Leader/Chairman leh Secretary te muongtah a ngansie ahi.

3.Tam Khanglai lamkaite(Leaders) kaikhawmtu ding in Convenor mini see/guot lemsah ahia, amauhte;Tv.S. Thangboi leh Nh.Haunieng ahi.

4.Kikhopna pen Khanglaite'n pawlpite veena(Tour/Visit) na dan a host unit te toh kikhopna paipi tou lemsah ahia, hinanleh, nu-le-pate a'ng kikhawm ut a um leh kipahpi(welcome) ahi zing hi.

5.Refreshment pen host unit te ngansie a hiding a, amauh hing saipieh/bawlpieh penpen lungdamtah a pom a hing hi.

Tam teng akigen zou in, keima bawl hi tahtahna chi etsahna in khutzietlam chiet dopna nei in pa Jangkhohau in thumna toh hun zou hi.

Lungdamna lianpi toh,

Tv.S.Joel Lianmang
Recording Secretary